Бүгін «Самрұқ-Қазына» АҚ портфельдік компанияларының өкілдеріне Астана поштамты мен қаладағы сұрыптау орталығының өндірістік процестері таныстырылды.

Іс-шара қатысушыларына Орталық операциялық учаскесінің, сәлемдемелер супермаркетінің, сұрыптау орталығының жұмысы таныстырылды, сондай-ақ пошта жөнелтілімдерін қабылдау, өңдеу және жолдау алгоритмі көрсетілді. Олар пошта жөнелтілімдерінің қалай буып-түйіліп, бағыттар бойынша таратылатынын көрді, сонымен бірге жеткізу мерзімдері туралы біліп, пошта қызметкерінің жұмысымен танысты, оларға өздерін қызықтыратын сұрақтарын қойды.

«Пошта бөлімшесінде 750-ден астам адам жұмыс істейді. Олардың арасында пошташылар, байланыс операторлары, сұрыптаушылар, курьерлер, жүргізушілер, инкассаторлар бар. Бір қызығы олардың жартысына жуығы - қырық жастан аспаған жас мамандар. Жастар – қоғамның болашағы, сондықтан жас қызметкерлерді өндіріске, филиал өміріне тарту біз үшін маңызды бағыттардың бірі болып қала бермек. Бізде өзіміздің тәлімгерлер, жастар кеңесі белсенді түрде жұмыс істеуде. Одан бөлек филиалдың кәсіподақ комитеті мүшелерінің 80%-ы жас қызметкерлер екенін атап өткім келеді», - дейді Астана поштамтының директоры Бақытжан Маликова.

Портфельдік компаниялардың жастар құрамының көшпелі бағдарламасын қордың жастар саясатын дамыту бағдарламасын іске асыру жөніндегі бірыңғай оператор – әлеуметтік өзара іс-қимыл және коммуникациялар орталығы ұйымдастырды.

Іс-шара жас мамандарды оқыту, тәжірибе алмасу және байланыс орнатуға, кәсіби өсу үшін жаңа мүмкіндіктерге, ой-өрісін кеңейтуге, компаниялардың тиімді өзара іс-қимылын ынталандыруға бағытталған.